SA RUGBY
Die Springbokke het vir die eerste keer in vyf jaar die Castle Lager Rugbykampioenskap gewen toe hulle Argentinië Saterdag in die Mbombela-stadion in Nelspruit met ‘n sege van 48-7 geklop het nadat hulle met halftyd met 27-7 voorgeloop het.
Die oorwinning was nooit in twyfel nie nadat die Springbokke – wat ‘n nuwe toetsrekord vir Eben Etzebeth (128 toetse) gevier het – ‘n sublieme begin gehad het wat die uitverkoopte skare van 43 578 in vervoering gehad het en hulle skaars tyd gegee het om óf te sit óf asem te skep in ‘n betowerende eerste 15 minute.
Hulle het die Pumas-verdediging in die openingsminuut gebreek, ná ‘n diep lynstaangooi, en hulle vir ten minste ses minute teen die toue gehad voordat Aphelele Fassi die eerste drie gedruk het, en uiteindelik nog ses drieë (teen een) sou byvoeg op ‘n wonderlike viering van Suidelike Halfrond rugby.
Drie tweede helfte drieë was nie net goeie beloning vir die Springbok-ondersteuners nie, maar ook ‘n waardevolle les vir die besoekers, wat toegelaat het dat hul gebrek aan dissipline die oorhand gekry het in die tweede helfte.
Die aanvanklike aanval in die besoekers se helfte het gelei tot vyf verdedigende strafskoppe wat die Pumas in die eerste vier minute afgestaan het. Die Bokke het twee keer die lynstaandryf probeer, maar albei kere het oortredings die dryfkrag gestuit. Nog twee strafskoppe is afgestaan – met die Bokke wat skrums gekies het – voordat die opening gekom het en Fassi onder die pale gaan druk het.
Jaden Hendrikse, wat vir hierdie ontmoeting die skoppligte by Manie Libbok oorgeneem het, het met die omskakeling die Bokke met 7-0 laat voorloop.
Die Bokke het byna dadelik teruggekom vir meer, dié keer nadat nog ‘n dominante skrum in hulle guns getel het en Pieter-Steph du Toit dit akrobaties kon afrond. Die flank het oor ‘n losskrum geduik – amper NFL-styl – om ‘n drie te druk, en toe Hendrikse die omskakeling op presies 14-minute oorskop, was die horlosie en telbord presies gelyk.
Krediet aan Argentinië. Geen span kom in die laaste wedstryd van ‘n kampioenskap sonder ‘n doel om dit te wen as hulle maklik oorgee nie en hierdie Pumas-span – wat reeds hierdie seisoen Australië, Nieu-Seeland en Suid-Afrika geklop het – is gemaak van sterker stoffasie.
Hulle het self in styl teruggekom toe ‘n knap skuins lopie deur die flank Santiago Grondona die losskakel Tomas Albornoz bereik het. Albornoz het onder die pale gedruk en verdoel om hul telling af te skop.
Maar die Bokke het hul voorsprong vergroot toe Hendrikse sy eerste toets-strafdoel van 35-m uit geskop het om dit 17-7 te maak.
Argentinië se senter Santiago Chocobares het die veld beseer verlaat en daarna het die vleuel Mateo Carreras ‘n geelkaart gekry ná ‘n hoë balbotsing met Fassi 30-minute in die wedstryd.
Fassi het hulle kort daarna duur laat betaal met sy tweede drie, ná talle fases deur die Springbokke tydens ‘n teenaanval van epiese dinamika.
Hendrikse het die dwarslat met sy doelskop getref, maar dit was net iets kleins teenoor ‘n sublieme vertoning wat aanhou gee het. Nog meer so toe Cheslin Kolbe drie minute voor rustyd ‘n drie gedruk het en sonder dat daar veel spasie was om mee te werk. Die drie het die voorsprong tot 20 punte opgestoot en ‘n gelukkige skare kon nie wag vir die laaste 40-minute nie.
Hendrikse het ‘n vroeë strafdoelpoging kort na rustyd misgeloop in ‘n andersins onberispelike vertoning en van sy spanmaats het ook raar hanteerfout begaan, maar die opwinding het in die Laeveld voortgeduur.
Daar was ook ‘n paar nie so perfekte oomblikke nie. Pablo Matera se skoueraanval op Vincent Koch se kop, wat hom ‘n geelkaart besorg het, het die kwaliteit-aspek van dié helfte ‘n bietjie geskaad.
Matera se kaart is na rooi opgegradeer en dit het enige kans wat die Pumas gehad het, onwaarskynlik soos dit was, beëindig om ‘n sprokie-einde te verseker.
Die sprokie het eerder met reg aan die nuwe konings van die Rugbykampioenskap behoort, wat drie laat sublieme drieë gedruk het.
Eers het Malcolm Marx oor die doellyn gegaan vir ‘n 21ste toetsdrie van die agterkant van ‘n sterk lynstaanbreuk, en toe druk Du Toit sy tweede drie, wat die 11de van sy toetsloopbaan is.
‘n Behendige Handré Pollard-skop het ook vir Jesse Kriel in volle vlug bereik, en hy het dit mooi afgerond deur ‘n drie te druk. Pollard het al drie die laat drieë verdoel om dit ‘n onvergeetlike dag vir alle Suid-Afrikaners te maak.
Puntemakers:
Springbokke 48 (27) – Drieë: Aphelele Fassi (2), Pieter-Steph du Toit (2), Cheslin Kolbe, Malcolm Marx, Jesse Kriel. Doelskoppe: Jaden Hendrikse (2), Handre Pollard (3). Strafdoel: Hendrikse.
Argentinië 7 (7) – Drie: Tomas Albornoz. Omskakeling: Albornoz.
