Die Minister van Bosbou, Visserye en Omgewing, Dr Dion George, het die 33 pas-gegradueerde veldwagters van die Krugerwildtuin (KNP) hartlik gelukgewens.
Die gegradueerdes het ‘n streng opleidingsprogram voltooi en is tydens ‘n seremonie in Skukuza as veldwagters ingehuldig.
Die Minister het die toewyding en veerkragtigheid van die nuwe rekrute geloof.
“Ek is trots op die toewyding en vasberadenheid wat elkeen van hierdie individue getoon het gedurende hul intense ses weke lange opleidingsprogram. Hierdie nuwe veldwagters sal kritiese ondersteuning bied aan ons bewaringspogings, een van Suid-Afrika se mees kosbare natuurlike erfenisse beskerm en ‘n belangrike rol speel in die behoud van ons biodiversiteit vir toekomstige geslagte,” het die Minister Dinsdag gesê.
Die streng vooraf-keurings- en [finale] keuringsproses, wat in Julie 2024 plaasgevind het, het beide fisiese uithouvermoë en geestelike sterkte van die leerlinge vereis.
Die gegradueerdes sal nou by die veldwagterskorps in verskeie afdelings van die KNP aansluit, wat bydra tot wetstoepassing en biodiversiteitsbewaringspogings in die park.
“Ons veldwagters is aan die voorpunt van die stryd teen stropery en omgewingsmisdaad. Hulle werk verseker die integriteit van ons beskermde gebiede, en ek vertrou dat hul bydraes ons gesamentlike pogings om Suid-Afrika se wild te beskerm sal versterk,” het George gesê.
Die Minister het ook sy dank uitgespreek teenoor Suid-Afrikaanse Nasionale Parke (SANParke) vir hul volgehoue leierskap in bewaring en hul verbintenis tot die handhawing van die hoogste standaarde in veldwagtersopleiding
