KIMBERLEY – Operasie Shanela gaan voort om misdaad in die provinsie te knou en het gelei tot ‘n menigte suksesse wat behaal is tydens aksies wat tussen 09 en 15 September 2024 deur die hele Noord-Kaap uitgevoer is.
Die aksies het gefokus op prioriteitsmisdade, insluitend dwelms, onwettige vuurwapens, kontakmisdade, trio-misdade en verswarende roof.
Die aksies het ook meer stewels op die grond gesien met verskerpte blouligpatrollies in brandpuntgebiede.
Multi-dissiplinêre spanne in al vyf distrikte naamlik Namaqua, Frances Baard, Pixley Ka- Seme, ZF Mgcawu en John Taolo Gaetsewe (JTG) het 231 verdagtes aangekeer en gearresteer vir misdade wat wissel van die onwettige besit van vuurwapens, handel in dwelms, onwettige handel in drank, roof, moord, poging tot moord, verkragting, aanranding en huisbraak.
Op 15 September 2024 het lede van Kuruman Openbare Orde Polisiëringseenheid toegeslaan op ‘n 35-jarige man by sy huis in Gantelang Village in Kuruman, nadat hulle twee ongelisensieerde 9 mm-vuurwapens met ammunisie in sy besit gevind het.
Speurders in die provinsie het 316 gesoekte verdagtes opgespoor en gearresteer vir ernstige misdade, insluitend sakeroof, moord, verkragting en aanranding.
Die spanne het toegeslaan op geïdentifiseerde persele, was betrokke by stop en deursoekings, hoësigbaarheidspatrollies, nakomingsinspeksies, padblokkades en voertuigkontrolepunte.
Altesaam 6 790 persone en 3 720 voertuie is voorgekeer en deursoek.
Verskeie ongelisensieerde drankwinkels is gesluit, en ‘n aansienlike hoeveelheid alkohol is gekonfiskeer.
Daar is tydens die aksies beslag gelê op ‘n aansienlike hoeveelheid dwelms, vervalste goedere en gevaarlike wapens.
