Tegniese entrepreneur Elon Musk is op dreef om teen 2027 die wêreld se eerste triljoenêr te word, volgens ‘n skatting deur die wêreldwye onderwysmaatskappy Informa Connect Academy.
Die projeksie wat Vrydag gepubliseer is, is gebaseer op Musk se gemiddelde jaarlikse welvaartgroeikoers wat op 109,88% staan.
Die eienaar van X (voorheen Twitter) is die rykste man ter wêreld met ‘n fortuin van $237 miljard, volgens die Bloomberg Billionaires Index.
Musk het ses maatskappye gestig, insluitend elektriese motorvervaardiger Tesla en ruimtetuigvervaardiger SpaceX. Tesla, wat ‘n markkapitalisasie van $669,28 miljard het, sal na verwagting volgende jaar die triljoen dollar-kerf bereik. Musk het Twitter in 2022 bekom, die platform X hernoem en meer regverdigheid en deursigtigheid belowe.
Ander multi-miljardêrs wat waarskynlik in die nabye toekoms by die Triljoenêrsklub sal aansluit, is Indië se rykste man Gautam Adani, Nvidia se uitvoerende hoof, Jensen Huang, en die Indonesiese magnaat Prajogo Pangestu. Al drie sal na verwagting teen 2028 triljoenêrs word, het Informa Connect Academy gesê. Die Franse sakeman Bernard Arnault, die voorsitter van die wêreld se grootste luukse konglomeraat LVMH, sal waarskynlik teen 2030 ‘n triljoenêr word.
Musk het die eerste keer in 2012 op die Forbes Billionaire-lys verskyn met ‘n netto waarde van $2 miljard. In 2021 het hy die wêreld se rykste man geword en Amazon-stigter Jeff Bezos verbygesteek. Musk het hierdie status in Desember 2022 aan Arnault verloor toe Tesla-aandele getuimel het, maar was ses maande later weer boaan die lys.
