Die Springbok-slot Eben Etzebeth het ‘duime-op’ gekry om Saterdag Nieu-Seeland op Emirates Airline Park aan te pak nadat hy al die oefensessies vandeesweek voltooi het. Hy is op die plaasvervangersbank vir die Castle Lager Rugbykampioenskap-ontmoeting opgeneem. Rassie Erasmus het vier spelers toegelaat om tydens die Carling Curriebeker-kampioenskap hierdie naweek ‘n bietjie waardevolle speeltyd te kry.
Etzebeth, wat aanvanklik uitgesluit is van die Bokke se wedstryd-23 vir die eerste van twee toetse teen hul aartsvyande in die suidelike halfrond weens ‘n beseringsprobleem vroeër die week, vervang Marco van Staden op die bank, wat aan die span spesialis-slotdekking bied vir die beginkombinasie van Pieter-Steph du Toit en Ruan Nortje.
Sou hy speeltyd kry, sal die toets Etzebeth se 125ste in die groen en goue trui wees, wat sal beteken dat hy vir Bryan Habana sal verbysteek as die tweede mees bekroonde Springbok van alle tye, en hom een stap nader aan Victor Matfield se Springbok-toetsrekord van 127 wedstryde sal neem.
“Ons keuringsbeleid was nog altyd dat as ‘n speler nie op ‘n Maandag oefen nie, hy nie Saterdag sal speel nie, maar Eben het die hele week sonder pyn deurgekom, so ons moes die moeilike oproep maak om hom in die span in te sluit ten koste van Marco,” het Erasmus gesê.
“Daar was rugsteunopsies vir ons op slot in die aanvanklike span, maar met Eben op die bank beteken dit ons het nog ‘n spesialis in daardie posisie in die span.
“Ons is geseënd om ‘n uitgebreide groep van ongeveer 45 spelers te hê wat almal ingekoop het by ons planne en wat verstaan wat die beste vir die span is, en dit is bewonderenswaardig hoe Marco die nuus aanvaar het. Dit wys die kwaliteit van die speler en persoon wat hy is.”
Erasmus het intussen vier spelers – Steven Kitshoff (stut), Manie Libbok (losskakel), Canan Moodie en Makazole Mapimpi (albei vleuels) – Woensdagmiddag aan hul provinsiale unies vrygestel om die naweek speeltyd in die Carling Curriebeker te kry.
Bron: SARU
