MARIUS BROODRYK
‘n 33-jarige vrou van Motherwell, Port Elizabeth, is op Dinsdag, 27 Augustus 2024 by die OR Tambo-lughawe gearresteer vir ‘n poging om 10 kg kokaïen vanuit Brasilië na Suid-Afrika te smokkel. Sy het onlangs na Brasilië gereis onder die dekmantel van inkopies vir haar ‘komende troue’.
Die Valke se Ernstige Georganiseerde Misdaad-ondersoekspan, bygestaan deur die doeane en ‘n hondeverklikker, het die dwelms in haar bagasie ontdek. Twee Nigeriese burgers, onderskeidelik 37 en 52 jaar oud, is ook in hegtenis geneem omdat hulle na bewering by die Internasionale Aankoms-saal gewag het om die dwelms te ontvang. Die drie sal op Donderdag 29 Augustus 2024 in die Kempton Park-landdroshof verskyn.
