George April
Twee broers het gisteroggend (Donderdag) in die vroeë oggend-ure in die George Kerridge woonbuurt in Vredenburg in hul plakkershut doodgebrand.
Volgens die buurvrou wat anoniem wil bly, is die brand veroorsaak deur ‘n onwettige krag-aansluiting. “Dit was omtrent twee uur in die oggend toe ons hoor hoe iemand skree ‘dit brand hier’.”
“Mense het uit hulle hokke gestorm en almal het probeer om die brand met water dood te gooi. Dit was moeilik, omdat daar nie baie krane is nie, dus was alle pogings tevergeefs. Toe die brandweer opdaag, was die skade reeds gedoen en die twee manne al doodgebrand.
“Een van die broers het nog antwoord gegee toe ‘n vrou sy naam uitgeroep het, maar dit het later stil geraak,” het die buurvrou vertel.
Op ‘n vraag van Die Waarheid, het die buurvrou gesê: “Die onwettige krag-aansluitings loop kruis en dwars in die woonbuurt.”
