Lede van die Mbizana SAPD het Sondagaand na Ezizityaneni nedersetting gegaan om ‘n moordtoneel waar ‘n man doodgeskiet is, te ondersoek. Die span is gelei deur die stasiebevelvoerder, lt kol Freemantle.
Net na middernag, op Maandagoggend, was drie (3) patrolliewaens op pad terug na die SSK vanaf die misdaadtoneel. Hulle het in Bizana hoofstraat gery, agter mekaar aan, maar ver uitmekaar.
Die eerste patrollievoertuig het verby die Total Vulstasie gery, toe geweerskote daarop afgevuur is deur gewapende mans wat aan die regterkant van die pad gestaan het.
Die bestuurder van die voorste voertuig het daarin geslaag om verby die lokval te ry nadat hy geskiet is en het by Mbizana SAPD gaan stilhou.
Die twee (2) insittendes van die voertuig het die aanval by die stasiebevelvoerder aangemeld.
Laasgenoemde het toe lede gemobiliseer en ook na die misdaadtoneel gegaan. Albei insittendes van die voertuig het skietwonde opgedoen.
Toe die tweede voertuig verby dieselfde plek ry, is daar ook op dit geskiet. Die bestuurder het beheer verloor en die voertuig het na links uitgeswaai, met ‘n elektriese paal gebots en tot stilstand gekom.
Die verdagtes het toe na die voertuig gehardloop en vier (4) polisiebeamptes met vuurwapens daaruit gedwing. Hulle het toe die polisiebeamptes ontwapen en een (1) R5-gewere en vier (4) 9 mm-pistole gevat. Hulle het toe die polisiebeamptes na die Total Vulstasie geneem, waar hulle hulle gedwing het om met die gesig na onder op die vloer te lê. Die werknemers van die Total Vulstasie het reeds op die vloer gelê en is met vuurwapens aangehou.
Die verdagtes het toe op nog polisiebeamptes gewag. Toe die derde polisievoertuig verskyn het, het die verdagtes ook geweerskote daarop afgevuur. Die bestuurder van die polisievoertuig is noodlottig gewond. Die voertuig het na regs uitgeswaai, met ‘n elektriese paal gebots en teen die muur van die winkel vasgery.
Die verdagtes het toe reeds na die voertuig gehardloop, waar hulle op die oorledene afgekom het. Sy vroulike passasier, sersant Mkizwana is ernstig beseer. Die verdagtes het toe die sersant se dienspistool gesteel en het haar in die voertuig gelos. Die oorledene was nie gewapen nie.
Die verdagtes is toe terug na die Total Vulstasie, waar hulle probeer het om die kluis met plofstof oop te blaas, maar was onsuksesvol.
Toe die verdagtes nie die kluis kon oopmaak nie, het hulle die misdaadtoneel verlaat en te voet verdwyn.
Alle relevante rolspelers het op die misdaadtoneel gereageer. Beseerde lede is na die hospitaal geneem.
Die saak word deur Mbizana DPCI ondersoek.
