Die karkasse van ongeveer 36 flaminke is in Mumbai, Indië se finansiële hoofstad, gevind. Die voëls is glo deur ‘n Emirates-vliegtuig ‘doodgeslaan’ oomblikke voordat dit geland het, volgens die Times of India.
Die dooie voëls is in die Ghatkopar-woonbuurt van Mumbai, naby die lughawe, gevind. Die vliegtuig is ook tydens die botsing beskadig en sy terugvlug na Dubai is gekanselleer.
Nabygeleë inwoners het aanvanklik gebreekte stukke vlerke, snawels en kloue ontdek wat oor ‘n groot gebied gestrooi was, waarna hulle bosbeamptes ingelig het. Plaaslike amptenare het ‘n soektog van stapel gestuur om uit te vind of nog flaminke in die ongeluk dood is.
Volgens D. Stalin, ‘n plaaslike omgewingskundige wat deur Hindustan Times aangehaal is, het nuwe kraglyne wat in die gebied gebou is, die voëls “gedisoriënteer” en die ongeluk veroorsaak.
Pawan Sharma, stigter van die Resqink Association for Wildlife Welfare (RAWW), het gesê die karkasse is vir lykskouing gestuur om die “presiese oorsaak van hul dood” te bepaal, volgens NDTV. RAWW is ‘n plaaslike nie-regeringsorganisasie wat poog om mens-wild konflikte op te los en stedelike wildbewaring te bevorder.
