Die Franse polisie het die burgemeester van die dorp Avallon in hegtenis geneem nadat 70 kg dagga gister by haar huis gevind is, het AFP en BFM TV berig.
Jamilah Habsaoui is sedert 2021 burgemeester van Avallon, ‘n dorp met 6 000 mense in die sentraal-oostelike Bourgogne-Franche-Comte-streek, en is ook ‘n streekraadslid. Daar is op haar huis toegeslaan as deel van ‘n voorlopige ondersoek na dwelmhandel.
Habsaoui het die eiendom drie jaar gelede gekoop, maar woon nie daar nie, het die koerant L’Yonne Republicaine berig. Dit het bygevoeg dat die Avallon-stadsaal ook deursoek is.
Altesaam sewe mense is gearresteer, insluitend twee van Habsaoui se broers, volgens die staatsaanklaer van Auxerre, Hugues de Phily. Hy het ook bygevoeg dat daar op verskeie plekke beslag gelê is op 983-gram kokaïen, €7 000 ($7 600) in kontant en sowat 20 goudstawe.
Die klopjag was deel van ‘n wyer veldtog teen dwelms genaamd ‘Place nette XXL’ wat vroeër vanjaar van stapel gestuur is. Sowat 473 klopjagte is uitgevoer, wat gelei het tot die arrestasie van meer as 7 000 verdagtes en die konfiskering van 3,6-ton dwelms, het Gerald Darmanin, minister van binnelandse sake, Sondag op X (voorheen Twitter) geskryf.
