JACQUES DE KLERK
Ons almal het ’n storie om te vertel van die kronkels en draaie wat ons lewenspad ons geneem het, maar party mense se stories is so dramaties en vreemd dat jy sal sukkel om te glo dit kom nie uit ’n storieboek uit nie.
Met kykNET se nuwe dokkie-reeks, Vreemder as fiksie, gaan kykers ’n blik kry op doodgewone mense se lewens wat skielik ’n nare nadraai geneem het, of deur bisarre gebeurtenisse omver gegooi is.
Izelle Venter, die uitvoerende vervaardiger van die reeks, sê die stories wat gedek word, draai nie om gebeure wat sommer die nuus haal nie.
“Ons fokus op die stories wat jy nou en dan langs ’n braaivleisvuur hoor en wonder of die vertellers die kat aan die stert beet het.
“Die reeks delf dieper in dapper mense se lewens wat gekonfronteer is met gebeure en karakters wat jy dink net in storieboeke kan gebeur,” sê sy.
Daar is 13 episodes en elke episode fokus op ’n ander familie.
“Die mense se naastes en ook kenners werp lig op hul ervarings: Van rare siektes en bonatuurlike gebeure tot wrede familiegeheime,” sê Izelle.
In die eerste episode volg die vervaardigers die storie van Benita Botha wat byna 20 jaar in die kloue van ’n kultus was. Sy het vir 15 jaar nie met haar ma of suster kontak gehad nie, en in plaas daarvan om die Here se werk te doen, is sy en haar familie vernietig.
In nog ’n episode maak mens kennis met Megan van Zyl, wie se hele lewe verander het in 2013 toe sy uitgevind het haar sussie is eintlik haar ma. Hoe leer jy om skielik vir jou sussie “ma” te sê wanneer jy daarmee saam ontdek jou ma is in der waarheid jou ouma? Megan is steeds besig om haar familiegeheim te probeer verwerk.
Cheryl-Ann Mostert was in ’n donker gat toe sy hoor sy het twee baarmoeders, twee servikse én twee vaginas. Sy het eers gedink sy het nierinfeksie, maar in 2012 het sy uitgevind wat werklik die geval is. En tog het sy ’n gelukkige gesin.
“Dis raar maar waar. Inderdaad vreemder as fiksie,” sê Izelle.
Vreemder as fiksie word elke Maandagaand vanaf 1 April 2024 om 20:00 op kykNET (DStv-kanaal 144) uitgesaai. Dié dokumentêre reeks sal ook op DStv Stream en DStv Catch Up beskikbaar wees.
