Dr Iqbal Survé, uitvoerende voorsitter van Independent Media, het tydens ‘n onderhoud op ‘Podcast and Chill with MacG’ gesê diegene in beheer van banke in die land gebruik hul invloed om bankrekeninge van die mense waarvan hulle nie hou nie te isoleer en te sluit.
Hy het gesê dit is deel van die ‘Stellenbosch Mafia’ se taktiek om bankrekeninge te gebruik om mededingende besighede te sluit.
“Die Stellenbosch mafia beheer vyf/ses banke, hulle beheer oor R6 triljoen wat 90% van hierdie land se ekonomie is. Die punt is as hulle nie van jou hou nie, as jy iets sê en hulle hou nie daarvan nie, as jy teen hulle meeding, as jy uitgesproke is, kan hulle jou rekening sluit. Jy het ‘n bankrekening nodig vir adverteerders, om goed te koop, om vir jou daaglikse goed te betaal, vir kos en ander goed.
“So hulle is nogal slim, hulle gebruik die banke teen jou. Wat sê die banke? Hulle sê Dr. Survé, ons weet jy het niks verkeerd gedoen nie, jy was nog nooit by korrupsie en geldwassery betrokke nie … hulle sê dit skriftelik. Maar dan sê hulle ons sluit jou rekening weens ‘reputasie’, want die media wat deur aandeelhouers van die banke gefinansier word, het 3 000 artikels oor my geskryf … iets wat niks met my te doen het nie.”
