Intensiewe ondersoeke deur polisiespeurders by Durban-Sentraal het ‘n deurbraak gemaak toe vier verdagtes vasgetrek is in verband met die Meester van die Hooggeregshof-bedrog waarin ‘n oorledene se boedel deur bedrieërs geteiken is.
In Julie 2022 het ‘n vrou na die Meester van die Hooggeregshof gegaan om ‘n eis vir haar oorlede seun te registreer, maar sy was verward toe sy meegedeel is dat haar seun se boedel van R700 000-00 reeds suksesvol geëis is deur ‘n persoon wat hom as die oorledene se biologiese vader voorgedoen het. Die saak is by die polisie aangemeld en ná baie maande se ondersoeke het die polisie Vrydag op vier verdagtes toegeslaan.
Zinhle Msomi (42), Lorraine Ndlovu (44), Zanele Hlengwa (45) en Nkosinathi Moya (62) is in Durban in hegtenis geneem en is steeds in aanhouding na hul eerste verskyning in die Durbanse landdroshof op dieselfde dag as wat hulle gearresteer is.
Ondersoeke het aan die lig gebring dat die skuldiges fiktiewe dokumente by die Meester van die Hooggeregshof sou indien en ‘n magtigingsbrief gevra het, sodat hulle op bedrieglike wyse teen bestorwe boedels kon eis.
Die vier verdagtes sal weer op 25 Augustus 2023 in die beskuldigdebank wees.
In ‘n ander bedrogsaak het die speurders ook onverpoosd gewerk om ‘n saak te ondersoek van ‘n vrou wat in Julie 2021 deur ‘n prokureur uit R120 000-00 bedrieg is. Die vrou was besig om ‘n eiendom te koop en sy het die dienste van ‘n prokureur gebruik wat het haar oortuig om die geld in sy trustrekening te deponeer. Nadat hy die geld ontvang het, het die prokureur sy kantoor in Princestraat in Umgeni ontruim.
Twee jaar nadat die saak aangemeld is, is die prokureur, 34-jarige Mzamaleni Ntuli Vrydag gearresteer en het dieselfde dag in die hof verskyn.
