Aandele van die Viëtnam-gebaseerde elektriese voertuig (EV) vervaardiger VinFast het Dinsdag tydens die eerste verhandelingsdag op die Nasdaq met meer as 68% gestyg. Die maatskappy is nou meer as $85 miljard werd, byna twee keer soveel as Ford of General Motors.
Volgens Refinitiv-data word Ford en GM onderskeidelik op $48 miljard en $46 miljard gewaardeer. Tesla is steeds die wêreld se grootste motorvervaardiger volgens markkapitalisasie, op $739 miljard, en die Chinese mededinger BYD is in die vierde plek met ‘n $93 miljard waardasie.
VinFast het deur ‘n spesiale doelverkrygingsmaatskappy (SPAC) op die beurs gegaan nadat hy ‘n samesmelting met die VSA-genoteerde Black Spade Acquisition voltooi het. Sy aandele het Dinsdag op $37,06 gesluit – 270% hoër as Black Spade Acquisition se IPO-prys van $10 in 2021. Teen die sluiting gister het die aandele net meer as $30 verhandel.
As die motorvervaardigingseenheid van die Viëtnamese konglomeraat Vingroup, is VinFast in 2017 gestig. Die maatskappy het vanaf Junie 122 vertoonlokale wêreldwyd geopen, en bou ‘n fabriek in Noord-Carolina om mee te ding met EV-vervaardigers Tesla en BYD in die Amerikaanse mark, asook tradisionele motorvervaardigers wat op hibriede en EV’s fokus. Die nuwe fabriek sal na verwagting in 2025 in aanvang neem, en volgens VinFast sal dit in die eerste fase tot 150 000 voertuie per jaar vervaardig.
Op ‘n vraag deur CNBC oor hoe VinFast beplan om met die groot spelers in ‘n mededingende mark soos die VSA mee te ding, het die maatskappy se uitvoerende hoof Le Thi Thu Thuy verduidelik dat “[Met] die hele wêreld en veral die VSA wat van binnebrandenjins na EV’s beweeg, is daar plek vir almal.”
