’n Haai het ’n Russiese burger in een van Egipte se gewildste strandoorde doodgebyt. Die afgryslike beeldmateriaal is op kamera vasgevang.
In ‘n boodskap wat gister op sy Telegram-kanaal geplaas is, het Rusland se konsulaat in Hurghada die dood van ‘n jong man naby ‘n openbare strand bevestig. In die lig van die aanval het Russiese diplomate landgenote aangeraai om wakker te wees terwyl hulle in die see swem en om enige beperkings wat deur Egiptiese owerhede opgelê word, streng te volg.
Die konsul-generaal, Viktor Voropaev, het aan TASS gesê dat die haai die 23-jarige Rus omstreeks 15:00 plaaslike tyd naby ‘Dream Beach’ getakel het.
Die amptenaar het ook onthul dat die oorledene nie ‘n toeris was nie, maar eerder ‘n geruime tyd in Egipte woon.
Verskeie Russiese Telegram-kanale het grafiese beeldmateriaal gepubliseer wat van die kus af deur omstanders geskiet is. In een video word gesien hoe ’n man ’n ent weg van die strand af in die water veg om sy lewe. ’n Haai se vin en stert is ook sigbaar bo die oppervlak, wat rooi word. Na ‘n kort rukkie verdwyn die man se kop onder die water terwyl die persoon wat verfilm herhaaldelik sê “O my God!”
’n Soortgelyke tragiese voorval het verlede somer in Hurghada gebeur. In Julie is twee vroue van onderskeidelik Oostenryk en Roemenië in een dag, suid van Hurghada, in haai-aanvalle dood.
