’n Bestuurder van ’n petroltenkwa is gister onherkenbaar verbrand nadat die tenkwa wat hy bestuur het beheer verloor en op die N1-hoofwegrigting noord naby Bothalaan in Centurion in Tshwane aan die brand geslaan het.
Die Tshwane-nooddienstedepartement het om ongeveer 18:39 ‘n oproep ontvang en onmiddellik verskeie brandbestrydings- en ondersteuningshulpbronne na die toneel gestuur. Brandbestryders kon die rook en vlamme van etlike kilometers van die voorval af sien en kon verskeie ontploffings hoor terwyl hulle die toneel nader.
Met aankoms op die toneel het die tenkwa op sy sy gelê en is reeds deur vuur verswelg. Die N1 was gesluit in die suidelike en noordelike rigtings tussen Bothalaan en die R21/N1 Flying Saucer-wisselaar.
Onherkenbare menslike oorskot, wat vermoedelik dié van die bestuurder is, is in die kajuit van die tenkwa gevind. Die tenkwa het na bewering 40 000 liter 93 oktaan petrol vervoer ten tyde van die ongeluk.
Die toneel is aan die Suid-Afrikaanse Polisiedienste se polisiebeamptes oorhandig om die oorsaak van die ongeluk te ondersoek.
