‘n Man het laat gister naby die Serwiese dorp Mladenovac, sowat 50 km (30 myl) suid van die hoofstad, Belgrado, op ‘n groep mense losgebrand. Amptenare het aan joernaliste bevestig dat minstens agt mense dood en 13 gewond is. Die verdagte, wat deur die media as Uros B. (21) geïdentifiseer is, is ná ‘n agt uur lange soektog in hegtenis geneem.
Luidens berigte het die tragedie met ‘n rusie op die skoolwerf begin, waarna Uros B. huis toe is en met ‘n outomatiese geweer teruggekeer het. Daar is berig dat hy uit ‘n bewegende voertuig geskiet en toe gevlug het. Berigte dui ook aan dat hy op drie verskillende plekke losgebrand het.
Vroeër hierdie week het ‘n graad sewe leerling by ‘n skool in Belgrado losgebrand en agt kinders en ‘n veiligheidswag doodgeskiet. Een onderwyser en ses leerlinge is in die skietery gewond. Die tiener is aangehou. Volgens die polisie het hy sy pa se geweer gebruik.
