Die Demokratiese Alliansie (DA) in Matjhabeng Plaaslike Munisipaliteit is bekommerd oor waterverliese wat regoor Riebeeckstad voorkom. Die gemeenskap is desperaat en kwaad as gevolg van 13 weke se aaneenlopende wateronderbrekings en geen antwoorde of verduidelikings van die munisipaliteit af nie.
Krane is al weke lank droog, met hoogliggende gebiede wat die ergste ly as gevolg van beurtkrag wat waterpompe affekteer. Boonop het groot agterstande in infrastruktuur en die groter aanvraag van inwoners verseker dat die munisipaliteit nie in staat is en/of onwillig is om oplossings vir die krisis te vind nie.
Die Balkfontein-waterpomp is steeds buite werking met geen antwoord oor wanneer dit herstel gaan word nie. Bloemwater het probeer om snags water te pomp om die DeErf-reservoir aan te vul, maar kan dit nie voortdurend doen nie weens moontlike skade en vereiste instandhouding.
Die waterverliese en -tekorte het duisende inwoners in Riebeeckstad geraak en ‘n perfekte storm geskep. Volgens die 2020/2021 ouditeur-generaal se verslag het waterverliese in Matjhabeng R323 miljoen beloop. Dit het daartoe gelei dat 56% van die water wat die munisipaliteit ontvang, deur waterlekkasies verlore gaan. Dit oorskry verreweg die nasionale norm van 15-30%.
Verouderende infrastruktuur, gebarste pype en onbeperkte verbindings is van die hoofuitdagings wat in die gesig gestaar word. Volgens ’n woordvoerder van Bloemwater skuld die munisipaliteit die direksie R4,8 miljard in onbetaalde rekeninge. As fondse reg bestee word, sal daar ‘n groot verbetering in die infrastruktuur en die voorsiening van water aan inwoners wees. Rolspelers blameer mekaar aangesien krane droog bly.
Die DA doen ‘n beroep op die munisipaliteit om die vermindering van nie-inkomstewater, opgradering van infrastruktuur en die opknapping van die watertoevoer aan die gemeenskap te prioritiseer. Watervoorsiening moet in alle munisipaliteite volhoubaar wees. Ons sal aanhou veg vir dienslewering en verseker dat die munisipaliteit aanspreeklik gehou word teenoor die gemeenskap. Die DA is verbind tot goeie bestuur en doen dus ‘n beroep op alle inwoners om te registreer om in die 2024 Nasionale en Provinsiale Regeringsverkiesing te stem.
