De Beers Consolidated Mines Ltd. is gestig om beheer oor diamantproduksie in Suid-Afrika uit te oefen
Op 13 Maart 1888 is De Beers Consolidated Mines Bpk. gestig om beheer oor feitlik alle diamantproduksie in Suid-Afrika uit te oefen. Die maatskappy was in Kimberley geregistreer, en was die samesmelting van die De Beers Mynmaatskappy en Kimberley myne onder die Kimberley Central Diamond Mining Company – bestuur deur Barney Barnato.
Diamante is in 1860 op De Beer se plaas, naby Kimberley, ‘n dorp wat later gestig sou word, ontdek. Twee myne is op die perseel gegrawe en was eens die wêreld se produktiefste diamantmyne.
Cecil John Rhodes het in 1871 ‘n aanspraak op die myn by De Beers gekoop, wat die begin was van sy oorheersing van die diamantmynbedryf in Suid-Afrika. De Beers het uitgebrei om die Dutoitspan-, Bultfontein- en Wesselton-diamantmyne in te sluit, wat gelei het tot die ontwikkeling van ‘n omvattende stelsel. Meer diamante is geproduseer en kort voor lank het ondergrondse mynbou die plek van oop myne ingeneem.
Sir Ernest Oppenheimer het in 1929 die voorsitter van De Beers geword en die maatskappy deur die Groot Depressie gelei.
Nuwe diamantafsettings is naby Lichtenburg in die Noordwes-provinsie en in Klein Namakwaland ontdek. Oppenheimer het ook diamante internasionaal bemark met die hulp van die Sentrale Verkoopsorganisasie (CSO), wat ook in 1890 deur Rhodes as die Londense Diamantsindikaat geskep is.
Die CSO het teen die laat 1980’s byna 80% van die wêreldwye diamanthandel beheer, maar toe die aanvraag verminder het, het dit gelei tot die vervanging daarvan deur die Diamond Trading Company (DTC) in 2000.
Harry Oppenheimer het sy pa se plek in 1957 ingeneem, en De Beers se besit uitgebrei deur die diamantpyp by Postmasburg van Finsch Diamonds te koop, en deur ‘n rol te speel in die ontginning van mariene diamante aan die kus van Namibië. De Beers was een van die eerste Suid-Afrikaanse maatskappye wat die MIV/VIGS-kwessie aangespreek het deur medisinale behandeling vir sy werknemers te borg. Die maatskappy het voortgegaan om die beskikbaarheid en prys van diamante wêreldwyd te beïnvloed, en is van onbillike handelspraktyke beskuldig.
Die grootste aandeelhouer in De Beers Consolidated Mines Ltd. is Anglo American PLC. Vandag bly die maatskappy die grootste vervaardiger en verspreider van diamante in die wêreld, en het belange in sintetiese diamante, minerale, ertse en mynbou, en verwerkingstoerusting.
Bron: SAHO
