Skip to main content

TITEL: Franz MarxUit die perd se bek

OUTEUR: Chris Vorster

Dis die biografie wat nie ’n biografie is nie. Daar is geen geraamtes uit kaste of skandes oor seks, dwelms en/of ruk-en-rol nie; geen verhoudingsintriges nie; vergeet ook van enige sensasionele openbarings.

Niks waarin Kwêla of Pasella sou belangstel nie. Skinderstories was daar weliswaar volop, en skinderbekke het altyd baie te sê gehad oor een van ons vermaak-elite, Franz Marx.

Soos Franz self sê: “Daar was soveel stories oor my, maar oor wie is daar nie? Was dit ʼn gay ou, het ek die stories daaroor gehoor. As dit vrouens was, het ek gehoor ek het hulle bygekom in my kantoor.

“Dit het my nooit gepla nie – as jy jouself vir ʼn toffie uitgee, gaan die mense aan jou suig. Dít het ek altyd geweet, maar hulle het nooit die waarheid geweet nie.

“Hulle het nooit geweet ek het twee kinders grootgemaak nie, nooit geweet ek was getroud nie; nie geweet wie is my vriende nie, en nie geweet met wie ek sosialiseer nie. Hulle het nooit geweet van my private lewe nie.”

Hierdie “biografie” – uit die perspektief van ʼn onwaarskynlike vertroueling – is ʼn verwerking van gesprekke met Franz (persoonlik en professioneel) deur die bekroonde akteur, skrywer en regisseur Chris Vorster. Dis ʼn vermaaklike ontdekkingsreis met ʼn leeftyd se wyshede en ‘n warboel “leuens” …

Chris Vorster – ook bekend as onder andere Ryno Lategan van 7de Laan-faam – is sedert 1995 ‘n skrywer en regisseur vir die verhoog en televisie. Hy het al ongeveer 55 verhoogproduksies geskryf, en het ook die regie van baie daarvan gedoen. Hy is tans ‘n dosent in film en televisie aan die Universiteit van die Vrystaat en het onlangs sy doktorsgraad in kreatiewe skryfkuns verwerf.

Leave a Reply