Meubels: Voorheen bemin is beter
Toe Die Waarheid Media onlangs sy kraaknuwe kantore aan die media, bekendes en uitgesoekte lede van die publiek bekendgestel het, het ons keuse van meubels baie kommentaar uitgelok. Ons het elke meubelstuk sorgvuldig uitgesoek – antiek, versamelbaar, en waardevol. Elke stuk is tweedehands. Kantoorhoof en redakteur Dirk Lotriet verduidelik hoekom hy glo dat gebruikte meubels ‘n verantwoordeliker keuse as moderne, splinternuwe meublement is.
Toe ons die eerste keer deur ons leë kantoorgebou – ‘n lieflike huis in ‘n Kemptonparkse voorstad naby aan die lughawe – stap en kollega Doreen Vermaak voorstel dat ons ou, versamelbare meubels as opsie oorweeg, het my ore gespits. Ek is immers ‘n groot liefhebber van antieke meublement.
Daar was egter een vraag wat in my agterkop bly maal het: hoekom op aarde sal enigiemand die geweldig baie tyd en moeite afstaan om gebruikte meubels stuk vir stuk te gaan soek en aan te koop? Dit is tog soveel makliker om nuwe goed by jou naaste meubelkettingwinkel te koop?
Maar is dit beter? Ek dink nie so nie. Ek glo dat dit om verskeie redes die moeite werd is om eerder daardie ouer stukke te jag.
1. DIS EKO-VRIENDELIK
Die aankoop van meubels wat reeds deur iemand besit word, help ons planeet. Daar is reeds genoeg goed op Moeder Aarde sonder om alles weer vir elke nuwe generasie nuut te maak.
Bome is immers hopeloos te waardevol om afgekap te word om iets te maak wat net deur een geslag gebruik gaan word!
Om houtmeubels of staalmeubels weg te gooi is nie goed vir die omgewing nie. Om nie eers te praat van die verpakking waarin nuwe goed kom nie … deur items te hergebruik, kry jy die kans om ‘n produk van hoë intrinsieke waarde te besit en terselfdertyd te help om vermorsing te verminder.
2. LAE KOSTE
Vir ‘n spaarsamige ou soos ek (“suinig”, beweer een van my kollegas) is die koste alleen ‘n aanloklike rede om gebruikte meubels te koop. As jy in ag neem dat nuwe meubels peperduur kan wees, kan jy berge geld bespaar deur gebruikte items van gehalte te koop.
Neem byvoorbeeld stukke soos boekrakke en vertoonkaste. Hulle sal tydens gewone gebruik baie min slytasie ervaar, wat hulle ‘n ideale keuse maak vir ‘n gebruikte kopie.
3. OU VAKMANSKAP
Ons het dit almal al by ons ouers gehoor: “Hulle maak nie meer goed soos voorheen nie”. En dit is die waarheid. Vandag se meubelmark is toegegooi met items waarvan die bougehalte en materiale bedenklik is. As jy vakmanskap en materiale van hoë gehalte wil hê, kan kwaliteit gebruikte items jou antwoord wees.
4. DIS AANPASBAAR
Die hergebruik van meubels en ander dekormateriaal is ‘n gewilde neiging in vandag se ontwerparena en -style.
Die internet het baie nuttige idees wat aangewend kan word om gebruikte of ou meubels op te knap.
Dit sluit nuttige oplossings in oor hoe om enige meubelstuk oor te verf, te herstel of selfs te herontwerp. Sodra jy ‘n gebruikte meubelstuk gekoop het, kan jy dit met basiese vaardighede herontwerp soos jy wil en dit boonop ‘n kleur van jou keuse gee.
5. UNIEKHEID
Niemand wil iets hê wat dieselfde of soortgelyk is aan dit wat in hul bure of vriende se huis staan nie. Om gebruikte meubels by jou inkopies in te sluit, bied ‘n opwindende geleentheid om ‘n seldsame stuk te vind.
6. LAE DEPRESIASIE
Die herverkoopwaarde van splinternuwe meubels – veral kantoormeubels – daal tot byna niks sodra jy dit in jou huis ingedra het.
Antieke en versamelbare meubels neem dikwels in waarde toe as jy oordeelkundig koop. Dit is ‘n verstandige belegging as jy dit vergelyk met die aankoop van nuwe meubels.
7. KARAKTER
Vakmanskap word vandag ‘n verlore kuns, aangesien die meubelmark gedryf is deur laekostegoedere in die massamark.
En erken dit maar: die goedkoop meubelstukke wat jy in jou plaaslike winkelsentrum kan aanskaf, het die siel van ‘n klam vadoek.
8. DIT SKEP STORIES
My gunsteling-meubelstuk in ons huis is ‘n ou bal-en-klou-kas. Ek het dit ‘n paar jaar gelede gerestoureer en rooi geverf nadat ek dit vir die prys van ‘n pastei en ‘n pakkie sigarette aangeskaf het. Dit was maar ‘n treurige buffet toe ek dit by die huis aangebring het, maar toe ek daarmee klaar was, was dit die fokuspunt van ons sitkamer.
Afgesien van die trots verbonde daaraan om dit van die stortingsterrein te red, het dit van die belangrikste oomblikke van my onlangse lewe gedeel: die geboorte van my dogter, my tweede huwelik … Dit het ons gesin se trane en waardevolste herinneringe gedeel.
Dit is nie net ’n vriendskap met ’n ou meubelstuk nie – ek word aan daardie kabinet verbind deur stories wat ek eenvoudig nie met nuwer items sou kon deel nie.
9. DIS GESONDER
Tweedehandse meubels sal jou huis nie met skadelike dampe vul nie. Goedkoop nuwe meubels word dikwels gemaak van spaanderbord, wat bymekaar gehou word deur formaldehied, ‘n erkende karsinogeen wat oog- en neusirritasie veroorsaak.
Die maklikste manier om dit te vermy, is om gebruikte te koop.
Om jou huis in te rig met tweedehandse stukke sal beslis meer tyd neem as ‘n besoek aan ‘n kettingwinkel.
Jy gaan in antieke winkels en op veilings moet rondsnuffel om dit te vind waarna jy soek. Jy gaan eksentrieke mense ontmoet en geweldig baie oor styl, ontwerp en ons geskiedenis leer. En jou huis sal uiteindelik meer karakter, warmte en lewe hê.
Boonop sal jy meer geld in jou bankrekening hê, wat altyd ‘n goeie ding is …
