Gedurende die ‘Marikana-slagting’ op 16 Augustus 2012 is 34 mynwerkers deur die Suid-Afrikaanse Polisiediens (SAPD) doodgemaak tydens ‘n staking by die Lonmin-platinummyn in Marikana, Rustenburg, Noordwes-provinsie. Die myn staan nou bekend as die Sibanye Still Water Myn.
Luidens berigte word president Cyril Ramaphosa in sy persoonlike hoedanigheid gedagvaar. Hy word spesifiek aanspreeklik gehou vir optrede deur owerhede, na aanleiding van ‘n e-posboodskap wat hy gestuur het – waarin hy die mynwerkers se optrede beskryf – “nie ‘n arbeidsgeskil nie – maar een wat krimineel was – en deur gepaardgaande optrede hanteer moes word “.
Die mynwerkers sê hierdie boodskap het tot die sterftes gelei. Die slagting was die mees dodelike gebruik van geweld deur Suid-Afrikaanse veiligheidsmagte teen burgerlikes sedert die Soweto-opstand in 1976, en is vergelyk met die Sharpeville-slagting in 1960.
