Skip to main content

Tien voor een deur Adele Vorster

Dis die verhaal van ’n veertigjarige vrou se bestekopname van haar lewe. Sy is sieklik vetsugtig, en kos speel ’n baie belangrike rol. Dis in die vorm van dagboekinskrywings, SMS’e en e-posse.

Dit bied ’n kykie in die psige van ’n eetverslaafde; iets waarmee baie lesers sal kan identifiseer. Dis ook ’n liefdesverhaal (wat in die verlede afspeel), d.m.v. sms’e en e-posse en derdens volg die leser die broodkrummels na die jeugtrauma wat haar gedefinieer het.

Hierdie is ’n roman wat jou verbeelding beetpak en nie maklik laat gaan nie. Omdat dit in kleinerige brokke aangebied word, omdat dit soveel donker humor bevat en ontdaan is van selfbejammering, omdat die taal so lewendig is, is dit toeganklik sowel as … wel, gewigtig.

Adele Vorster woon in Bloemfontein en hierdie is haar debuutroman. Die manuskrip is voltooi ter verkryging van die graad M.A. in Kreatiewe Skryfkuns aan die Universiteit van die Vrystaat.

Leave a Reply