Graan SA se NAMPO Oesdag is een van die grootste landbou-uitstallings onder private besit in die suidelike halfrond en dit vind jaarliks plaas net buite Bothaville in die Vrystaat.
Dit word vanjaar tussen 16 en 20 Mei aangebied.
Die eerste NAMPO Oesdag is in 1967 op die plaas Donkerhoek naby Bloemfontein gehou en is deur 200 produsente bygewoon. Daarna is die Oesdag op verskeie plase gehou totdat die omvang van die geleentheid ‘n meer permanente adres genoodsaak het. In 1974 is die NAMPO Oesdag dus gestig op ‘n permanente terrein buite Bothaville, wat vandag as NAMPO Park bekend staan.
Graan SA se NAMPO Oesdag stel produsente en ander rolspelers in die landboubedryf in staat om die nuutste tegnologie en produkte wat in die boerderybedryf aangebied word, eerstehands en op een terrein te ervaar.
Die NAMPO Oesdag bied ook aan produsente die geleentheid om deur middel van debats- en besprekingspanele kennis van kundiges op hul verskillende landbougebiede te bekom. ‘n Unieke aspek van die NAMPO Oesdag is dat dit ‘n veelsydige aanbieding is wat ‘n wye spektrum aan die produsent bied, terwyl ander uitstallings gewoonlik net op spesifieke areas van landbou fokus.
Die produkte en dienste wat deur die meer as 750 uitstallers vertoon word, vestig die NAMPO Oesdag as ‘n gediversifiseerde handelsuitstalling, wat produsente die geleentheid bied om ‘n wye verskeidenheid produkte en dienste te vergelyk en sodoende hulle in staat stel om ingeligte besluite te neem. . NAMPO bied ook hoëvlak-uitstallings aan produsente met direkte toegang tot ‘n menigte spesialiste en kundiges op verskeie terreine.
