Inwoners van Benoni is besig om handtekeninge in te samel om van die regering te eis om onwettige mynwerkers, wat nou oral vir goudstof soek, te keer om naby hul huise te werk.
Hulle is net ‘n raps kort van 11 000 handtekeninge en benodig 20 000.
’n Plaaslike wyksraadslid sê gemeenskappe besef dat die sluiting van onwettige mynbedrywighede lewensbestaan sal beïnvloed, maar is bekommerd oor hul eie veiligheid.
Inwoners vra vir onmiddellike ingryping deur die Stad Ekurhuleni en die Parlement se portefeuljekomitees oor Minerale Hulpbronne en Energie, Polisie, Binnelandse Sake en Omgewing, Bosbou en Visserye.
Die skietgevegte tussen mededingende groepe, lyke wat gereeld naby hierdie myne gevind word, en die geraas van plofstof en ondergrondse gehamer wat plaasvind, is volgens inwoners onuithoudbaar.
“Nie net het die onwettige aktiwiteit ’n groot impak op die omgewing nie, dit beskadig infrastruktuur en bates, jaag besigheid weg en plaas die lewens en gesondheid van inwoners in gevaar,” lui die petisie.
