Skip to main content

‘n Nuwe polisiekommissaris moet gevind word aangesien die huidige een, Khehla Sitole, se uurglas uitloop. Hy moet sy kantoor eerskomende Donderdag verlaat, en onderhoude word volgens bronne in die geheim gehou om sy pos te vul.

Sitole was op 1 Maart 2016 aangestel as die Afdelingskommissaris van Beskerming en Sekuriteitsdienste, ‘n pos wat hy beklee het tot 22 November 2017 toe hy deur oudpresident Jacob Zuma tot die Nasionale Kommissaris van die Suid-Afrikaanse Polisiediens bevorder is.

Volgens inligting is daar verskeie topgeneraals wat om sy pos meeding, insluitende sy adjunk, Francinah Vuma.

Vuma het haar loopbaan in 1987 as ‘n studentekonstabel begin in die gemeenskapsdienssentrum in KwaMhlanga Polisiestasie. Sy het haar pad deur die polisiëringsgeledere opgewerk en in verskeie poste gedien in die finansiële, voorsieningskettingbestuur, misdaadnavorsing en ondersteuningsomgewings tussen 1988 en 2010.

Tussen 2010 en 2017 het lt.genl. Vuma gedien as die hoof van klagtes teen die SAPD-komponent onder die SAPD-inspektoraat en nasionale bestuursingryping, voordat sy die pos van die hoof, operasionele ondersteuning in die beskermings- en sekuriteitsdienste aanvaar het.

Volgens die polisie is sy ‘n ervare administrateur en senior bestuurder in die organisasie.

Vuma het ‘n B.A. Honneursgraad in Polisiepraktyk en ten tyde van haar aanstelling as Sitole se adjunk, was sy besig om te studeer vir ‘n Meestersgraad in Polisiëring. Sy het ‘n aantal bestuurs- en leierskapprogramme suksesvol voltooi.

Die geheimhouding agter die verkiesing van die nuwe polisiekommissaris het woede by die Instituut vir Sekerheidstudies en Corruption Watch laat opvlam aangesien aanstellings vir jare reeds oop en deursigtig was.

Leave a Reply