Dit was inderdaad ‘n hartseer dag toe Soedan, die laaste bekende noordelike witrenoster bul ter wêreld, op Maandag 19 Maart 2018 aan ouderdomsverwante komplikasies by Ol Pejeta Conservancy in Kenia oorlede is.
Najin en Fatu is nou die enigste twee oorblywende noordelike witrenosters in die wêreld.
Najin en Fatu is op 20 Desember 2009 van Dvur Kralove-dieretuin in die Tsjeggiese Republiek na Ol Pejeta oorgeplaas.
Almal het gehoop dat hulle op ‘n natuurlik wyse dragtig sou raak, maar die enigste hoop om hierdie bedreigde spesie te probeer red, is deur ‘n wetenskaplike deurbraak. Daar is tans navorsing aan die gang om ‘n noordelike witrenosterkalf voort te plant met uitsluitlik die in vitro-bevrugting (IVF).
Dit is beslis nie ‘n maklike taak nie, en weens die hoë koste daarvan kan dit nie dikwels probeer word nie. Daar is egter goeie vordering gemaak met die ontwikkeling van die proses, en daar word beraam dat ‘n bykomende $ 10 miljoen nodig sal wees om die navorsing te voltooi en die nodige prosedures te ontwikkel.
Dit kan egter tot tien jaar duur voordat bevredigende resultate behaal sal word.
Die witrenoster en die swartrenoster kom in Afrika voor en die Indiese renoster, die Java-renoster en die Sumatraanse renoster kom in Asië voor.
Renosters het ‘n lewensverwagting van tussen 40 en 50 jaar, en die natuurlike voortplanting van bejaarde renosterkoeie blyk dus nie meer ‘n lewensvatbare pad te wees nie.
Al wat nou oorbly is “hoop” om die spesie van uitwisting te red.
Let wel! Voordat jy aan ‘n liefdadigheidsorganisasie skenk!
As jy wil hê jou skenkings moet tel, doen navorsing voordat jy ‘n skenking maak en wees versigtig dat dit nie net nog ‘n bedrogspul is nie!! Daar word gepoog om met hierdie renosters se storie geld uit mense te kul.
