President Cyril Ramaphosa het parlementslede gister geskok tydens ‘n vraag-en-antwoord-sessie in die parlement toe hy die woord ‘f*k*l’ gebruik het.
Sy antwoord het die kragwoord bevat nadat die EFF-leier, Julius Malema, hom gevra het hoekom Ramaphosa so bang is vir Beki Cele, die minister van polisie.
“Wat is dit dat jy so bang is vir eerbare Bheki Cele dat jy bereid is dat ons soos vlieë sal sterf omdat jy politieke doeltreffendheid wil bevredig?” vra Malema.
“Agbare Malema, ek hoor wat jy sê, maar ek vrees f*k*l,” was Ramaphosa se antwoord.
Dit het verskeie LP’s geskok.
Die UDM se adjunkpresident, Nqabayomzi Kwankwa, het ‘n kwartuur later ‘op ‘n punt van orde’ opgestaan en gesê: “Ek moes by eerstetaal Afrikaanssprekendes hier uitvind of die woord f*k*l parlementêr is. Hulle het bevestig dit is inderdaad nie parlementêr nie,” het hy gesê.
“Dit sal ‘n hartseer dag wees as die woord ‘f*k*l’ die leksikon van die parlement binnekom omdat die president dit hier gebruik het. LP’s sal dit in die toekoms gebruik en die speaker sal hulle nie tot orde kan roep nie.”
‘n Laggende Ramaphosa het die woord teruggetrek. “Ek moes dit nie gesê het nie. Kanselleer dit en sê dalk net ek het ‘niks’ gesê — ‘niks’ is ook ‘n Afrikaanse term so ek onttrek [f*k*l].”
