Daar is vrese dat baie mense gesterf het nadat ‘n boot met Electricity Supply Corporation of Malawi (ESCOM) personeel en beamptes van die Mariene Departement van die Malawi Polisiedienste in Chikwawa aan die Shirerivier omgeslaan het.
Escom sê in ‘n verklaring dat die boot ook ‘n paar plaaslike mense vervoer het voordat dit Donderdagaand omgeslaan het.
Innocent Chitosi, ESCOM se Bestuurder van Openbare Betrekkinge, het die voorval bevestig.
Volgens Chitosi het die boot sowat tien mense vervoer en is reddingspogings aan die gang.
Luidens ‘n berig in die Nyasa Times was die span besig om krag te herstel in sommige dele van die Laer Shire in die nasleep van die tropiese storm Ana.
Reddingspogings is belemmer deur ‘n skielike oplewing in watervlakke in Shirerivier.
Dit is nie bekend gemaak waarom die ingenieurs en tegnici nie lewensredderstoerusting gedra het nie.
