Die vermeende baasbrein agter die ontvoering van 10 buitelandse burgers in Januarie in Polokwane het gister in die landdroshof in Polokwane verskyn.
Dilpazeer Azam, ‘n 39-jarige Pakistanse burger, is Sondag in Centurion gearresteer tydens ‘n intelligensie-geleide operasie bestaande uit lede van Nasionale Misdaadintelligensie, Hoofkantoor Georganiseerde Misdaad, Gauteng Georganiseerde Misdaad, Johannesburg K9-eenheid, Gauteng Gyselaar Onderhandelingspan, Ekurhuleni Polisie Departement SWAT en private sekuriteitsmaatskappye.
Die verdagte het die eerste keer Dinsdag voor die Pretoria-landdroshof verskyn waar sy saak na die Polokwane-landdroshof oorgeplaas is. Voorlopige ondersoek het aan die lig gebring dat die verdagte oproepe na die families van die slagoffers gemaak het om losprys te eis.
Daar word berig dat tien buitelandse burgers op 26 Januarie vanaf Musina langs die N1 gery het toe hulle deur ‘n ander voertuig voorgekeer is. Die slagoffers is na bewering in ‘n ander voertuig gelaai en is na Polokwane vervoer waar hulle na bewering naby die Peter Mokaba-stadion aan die verdagte oorhandig is.
Gister het die ondersoekspan intelligensie-inligting geoperasionaliseer wat hulle na ‘n lodge in Bruma, Johannesburg gelei het waar die tien slagoffers gevind is.
Die verdagte sal Donderdag terug wees in die Polokwane-landdroshof.
Polisie-ondersoeke duur voort.
