Bheki Cele, die minister van polisie, het sy bewering dat afgedankte Wes-Kaapse toppolisie-generaal Jeremy Vearey ‘n ‘kultuur van straffeloosheid gedemonstreer’ het, teruggetrek.
Cele het in ‘n brief gedateer 22 Desember 2021 die waarnemende sekretaris van die Parlement, Baby Tyawa, ingelig dat hy sy antwoord op ‘n geskrewe parlementêre vraag van Henry Andries Shembeni, EFF-LP, wat besonderhede oor die impak van Vearey se afdanking wou hê, terugtrek.
In sy brief aan die waarnemende sekretaris van die Parlement, Baby Tyawa, het Cele gesê: “Aangaande bogenoemde, het dit onder my aandag gekom dat die aangeleentheid van generaal-majoor Vearey se afdanking na die Arbeidshof verwys is. ‘n Volledige en omvattende reaksie sal verskaf word op die afsluiting van die Arbeidshofproses. U begrip in hierdie verband word waardeer.”
