Skip to main content

Die polisie in Mpumalanga is op soek na die boewe wat Maandag op ‘n ma en haar twee kinders  naby die Krugerwildtuin geskiet het in ‘n poging om hulle te kaap. Een van die kinders, ‘n dogter, is tydens die gebeure gewond.

Volgens ‘n polisiewoordvoerder,brigadier Selvy Mohlala, het die gesin die wildtuin verlaat. Die 40-jarige vrou het verby ‘n taxistaanplek in Mganduzweni Trust, Witrivier, gery.

“[Die] vrou het in haar wit Hyundai-voertuig saam met haar twee kinders gery toe twee gewapende mans hulle aangeval het. Die verdagtes het ‘n paar skote op hulle afgevuur en ‘n meisie gewond. Daar word gesê dat die vrou toe gery en [iewers] gestop het waar sy het bystand van ‘n lid van die publiek gekry,” het Mohlala bygevoeg.

Die polisie kon nie die ouderdomme van die kinders verskaf nie.

 

Die Suid-Afrikaanse Nasionale Parke (SANParke) het in ‘n verklaring gesê die gesin het langs die R538, naby die park se Numbi-hek, gereis.

“Hierdie betreurenswaardige voorval behels ‘n gesin wat broodnodige toerisme-inkomste na die Mpumalanga-provinsie gebring het,” het waarnemende SANParke HUB, Dumisani Dlamini, gesê.

Hy het besoekers aangeraai om ekstra waaksaam te wees wanneer hulle deur misdaadbrandpunte buite die nasionale park reis omdat die risiko van opportunistiese misdaad daar groter is.

“Ons het met ons kollegas in die provinsiale veiligheidskluster gekommunikeer om alle roetes wat na die Kruger [Nasionale Park] lei te beveilig deur gereelde patrollies en sigbare polisiëring. Die Suid-Afrikaanse Polisiediens (SAPD) het ‘n soektog na die oortreders van stapel gestuur. Ons versoek verantwoordelike gemeenskapslede om aktief te wees in die beskerming van toeriste wat die provinsie besoek, aangesien toerisme die sleutel is tot die bevordering van landelike ekonomiese aktiwiteit,” het Dlamini gesê.

Die SAPD raai slagoffers van misdaad aan om alle misdade by hul tolvrynommer 08600 10111 aan te meld.

Leave a Reply