Die President van Zimbabwe, Emmerson Mnangagwa, het gevra dat die oorskot van kolonialis Cecil John Rhodes opgegrawe en na Brittanje gerepatrieer word.
Rhodes, wat in 1902 dood is, is by Matobo Hills Nasionale Park, suid van Bulawayo, begrawe.
Mnangagwa het Vrydag in Harare aan tradisionele leiers gesê Rhodes se oorskot moet teruggegee word in ruil vir Zimbabwiërs se voorouers se oorskot in die VK.
“Ons het steeds Rhodes se oorskot in Matobo. Wat dink jy daarvan? As jy na die heiligdom gaan, weet jy nie of jy met Rhodes of ons voorvaders praat nie. Sy oorskot moet terugbesorg word na waar hy vandaan kom en ons kan ook ons voorvaderlike oorskot kry wat in Europa gehou word,” het Mnangagwa gesê.
Oproepe vir Rhodes se opgrawing dateer terug na 2012. Wyle oudpresident Robert Mugabe het oorlogsveterane en Zanu-PF-politici verhinder om sy oorskot op te grawe en gesê sy nalatenskap is deel van die land se geskiedenis. Die veterane het sy graf die skuld gegee vir die gebrek aan reën in die Matobo-omgewing, skryf Sharon Mazingaizo.
