Ayanda Dlodlo, die minister van staatsdiens en administrasie, het gesê dat 26% van staatsamptenare in senior bestuur nie die regte kwalifikasies vir die poste wat hulle beklee het nie.
Die syfer het van 35% in April vanjaar gedaal. Senzo Mchunu, die voormalige minister van staatsdiens en administrasie, het destyds onthul dat uit 9 477 senior bestuurders 3 301 nie die vereiste kwalifikasies gehad het nie.
“As gevolg van inligting wat in die omsendbrief oorgedra is, het die aantal senior bestuursdiens (SBD) lede, wat nie die vereiste kwalifikasies het vir die pos wat hulle tans beklee nie, afgeneem van 35% (in April) tot 27,29 % teen Julie 2021, en verder tot 26% teen 31 Oktober 2021. Dit is omdat, soos voorheen gesê, daar dalk SBD-lede kan wees wat oor behoorlike kwalifikasies beskik, maar dit word nie op die Persal-stelsel weerspieël nie,” het Dlodlo gesê.
