Die polisie in Walmer, Gqeberha, het ‘n ondersoek geopen nadat ‘n geraamte wat gedeeltelik begrawe is aan die voet van ‘n sandduin in Sardiniëbaai-strand gister gevind is.
Volgens polisie-inligting is die gedeeltelik begrawe geraamte omstreeks 10:50 deur ‘n persoon ontdek wat naby die duine geloop het. Die polisie is in kennis gestel en het bevestig dat die geraamte moontlik vir ‘n tydperk begrawe is. Dit was tussen 5 tot 25 cm onder die sand. Daar was geen klere of enige ander inligting wat die polisie kon help met enige identifikasie nie.
Die skelet sal vir forensiese ontleding gestuur word om ras, ouderdom en geslag te bepaal.
In hierdie stadium word ‘n ondersoek geopen, maar die polisie doen ‘n beroep op enigiemand wat enige persoon as vermis of verdrink het aangemeld het om D/Lt Kol Melody Oranje by SAPD Walmer speurders te kontak by 082 441 8505 of 041 581 1496 of 041 509 4000 of Crime Stop by 08600 10111 of hul naaste polisiestasie.
