Samantha en Johann Pieterse dank hul sterre en die mediese nooddiensspan wat hul babaseun, Luke, laat oorleef het nadat hy kort na geboorte moes baklei vir elke asemteug.
“Ons het beplan vir ‘n tuisgeboorte saam met ons vroedvrou, en alles het goed gegaan toe ek laat op die nag van Maandag, 29 November, kraam,” sê Samantha, ‘n professionele verpleegster wat by ‘n staatskliniek werk. “Die volgende oggend is ons pragtige seun Luke gebore. Toe hy in die wêreld kom, het hy gesukkel om asem te haal. Hy is gebore met aangebore longontsteking.
“Dit was baie ontstellend. Sy asemhaling was so moeisaam dat ons sy hyg kon hoor en die vroedvrou het gesê ons moet dringend mediese hulp ontbied. Dit was vir my so ’n skok dat ek ineengestort het,” sê sy.
Baba Luke het asemhalingsnoodsindroom ervaar, en sy lippe en vingers het blou geword van ‘n gebrek aan suurstof.
Binne ‘n baie kort tydjie nadat hulle die oproep ontvang het, het die spanne by die Pieterse huis in Rooihuiskraal aangekom om die babaseuntjie in ‘n kombers toegedraai te vind. Die paramedici het opgemerk dat hy nie huil nie, wat ongewoon is by ‘n pasgebore baba en dikwels ‘n teken kan wees dat hulle nie goed op hul eie asemhaal nie.
Gelukkig het die ICU toegeruste ambulans paramedici in staat gestel om Luke op gevorderde neonatale ventilasie te plaas en hom feitlik onmiddellik te stabiliseer. Binne minute na aankoms het die ambulans die geventileerde baba na die hospitaal gehaas, vergesel deur sy pa. Die span het Luke se bloedsuurstofvlakke en hartklop gemonitor onder ander noodsaaklike ondersoeke op pad en teen die tyd dat hulle aankom, het Luke se asemhaling en kleur verbeter en hy was stabiel.
Intussen is Samantha in die ander ambulans hospitaal toe vervoer en binne ‘n paar dae in die hospitaal was beide ma en haar babaseun gesond genoeg om huis toe te gaan.
