Twee groot patologie-laboratoriums het ooreengekom om hul pryse vir Covid-19 PCR-toetse tot R500 (BTW ingesluit) te verlaag.
Dit na onderhandelings deur die Mededingingskommissie met Ampath en Lancet Laboratories nadat die Raad vir Mediese Skemas gekla het dat toetspryse buitensporig en onregverdigbaar is.
Die nuwe tariewe – dit was voorheen sowat R850 per toets – plaas die kollig egter weer op die doeltreffendheid van PCR-toetse.
Ofskoon antigeen-kitstoetse algemeen is, word PCR-toetse – toetse waar genetiese material in ‘n laboratorium ontleed word – as die goudstandaard beskou.
Dit is algemeen bekend dat kitstoetse minder effektief as PCR-toetse is en makliker ‘n valse negatiewe uitslag kan gee. Die vervaardigers van antigeen-toetse, wat hulle toetse self vir akkuraatheid sertifiseer, beweer die effektiwiteit is rondom 93%, maar onafhanklike toetse het heeltemal ander syfers opgelewer.
In ‘n studie deur navorsers by Duitsland se Paul Ehrlich-instituut, die Robert Koch-instituut en Berlyn se Charite-hospitaal, kon 20% van die antigeentoetse wat op die mark beskikbaar was, nie die virus opspoor nie. 26 van die 122 ondersoeke toetse het nie eens aan die minimum vereiste, wat 75% sensitiwiteit is, voldoen nie.
Voorstanders van die PCR-toets beweer dit is 99.9% akkuraat, maar deskundiges van die Johns Hopkins-instituut het bevind (hulle navorsingsverslag is beskikbaar by Variation in False-Negative Rate of Reverse Transcriptase Polymerase Chain Reaction–Based SARS-CoV-2 Tests by Time Since Exposure | Annals of Internal Medicine (acpjournals.org)) dat dit glad nie die geval is nie.
Veral in die eerste dae na besmetting en selfs die eerste week waarin simptome waargeneem kan word, kan die afwyking so hoog soos 20 tot 38 persent wees.
Johns Hopkins maan gesondheidswerkers om nie lewensbelangrike besluite slegs op grond van PCR-toetsuitslae te neem nie.
