Eskom het binne net agt maande R96 miljoen aan inkomste verloor in Diepkloof, Soweto, as gevolg van onwettige verbindings, meteromseiling en kliënte wat elektrisiteit van spookverkopers koop.
Eskom het as gevolg daarvan elektrisiteitstoevoer na Diepkloof, Zone 3, heeltemal afgesny.
Volgens Eskom is netwerkoudits, ‘n standaardproses om energieverliese te bestuur en inkomste-invordering in al sy gebiede van voorsiening regoor Gauteng te verbeter. Tydens hierdie proses word onwettige verbindings verwyder, die netwerk word beveilig, enige skade aan die infrastruktuur word herstel en heraansluitingsfooie word uitgereik aan kliënte wat oortree het. Ongeveer 700 kliënte is in Diepkloof, Zone 3, ontkoppel en hulle moet ‘n heraansluitingsfooi van R6 052.52 vir nie-betaling van elektrisiteit betaal. Toevoer sal dan herstel word sodra die heraansluitingsfooie vereffen is.
