Wildbewaarders, veeartse, casinopersoneel, konstruksie- en vervoerbedryfwerkers, sowel as doeane- en ander staatsamptenare, is geïdentifiseer as rolspelers in die ekosisteem van onwettige handel in wild en wildprodukte volgens ‘n verslag deur die Suid-Afrikaanse Anti -Geldwassery Geïntegreerde Taakmag (SAMLIT).
Die SAMLIT het in ‘n verklaring gesê die verskillende rolspelers, en die metodes wat hulle vir onwettige handel in wild (IWT) gebruik het, is vasgelê in ‘n verslag wat deur ‘n deskundige werkgroep saamgestel is. Die SAMLIT-werkgroep het gefokus op die geldvloei wat met hierdie handel verband hou.
“Onwettige handel in wild, wat tussen US$7 en US$23 miljard per jaar gewaardeer word, word deur die Wêreld Ekonomiese Forum aangehaal as een van die winsgewendste kriminele ondernemings wêreldwyd, naas wapenhandel, dwelms en mensehandel, maar dit ontbreek prominensie as ’n finansiële misdaad,” lui die verslag.
