Max, ‘n macaw van ‘n voëlskuiling in die Wes-Kaap, het ‘n ten volle funksionele 3D-gedrukte prostetiese snawel ontvang nadat hy betrokke was in twee afsonderlike gevegte met ander macaw’s. Sy snawel was erg beskadig en hy het gesukkel om te eet.
Danksy ‘n span van die Universiteit van Pretoria (UP), onder leiding van professor Gerhard Steenkamp, ’n veeartsenykundige spesialis in tandheelkunde en kaakchirurgie by die Fakulteit Veeartsenykunde, het Max ‘n nuwe lewe gekry met ‘n 3D-gedrukte snawel.
Die chirurgie is onlangs by die Robberg Veeartsenykliniek in Plettenbergbaai uitgevoer, met die plaaslike veearts Dr Brendan Tindall wat die narkose toegedien het, prof Steenkamp wat die prostese geheg het, en voormalige UP professor en spesialis prostodontis, prof Cules van Heerden, wat bygestaan het.
Die operasie, wat glo die eerste van sy soort in Suid-Afrika is, is onder leiding van prof Steenkamp uitgevoer. Dit het samewerking met Bloemfontein se Sentrale Universiteit vir Tegnologie en bedryfsvennote vereis.
Volgens inligting van die Facebook groep Hyacinth Haven Bird Sanctuary gaan dit baie goed met Max en dat hy vir die eerste keer in twee jaar weer aan sade en soliede kossies kon knibbel.
