Ekurhuleni se burgemeester, Mzwandile Masina, is the nuutste stem uit ANC-geledere wat eis dat president Cyril Ramaphosa ingevolge die party se opsystaan-resolusie moet bedank. Hy is egter onduidelik oor wat presies Ramaphosa verkeerd gedoen het.
Lede van die Magashule-Zuma-faksie het vandeesweek een vir een die druk op Ramaphosa begin verhoog oor beweerde stemkopery by die Nasrec-nasionale konferensie in 2017. Hulle beroep hulle op ‘n bepaling in een van die ANC se resolusies wat vereis dat almal wat beskuldigings van bedrog en korrupsie in die gesig staar, opsy moet staan.
Tony Yengeni, die voormalige voorsitter van die portefeuljekomitee vir verdediging, het Vrydag gesê Ramaphosa moet die voorbeeld stel deur te bedank, maar het nie ‘n oortreding uitgestippel nie.
Andile Lungisa, voormalige adjunkpresident van die ANC-jeugliga en ‘n stadsraadslid van Nelson Mandelabaai, het Ramaphosa Saterdag in ‘n tweet daarvan beskuldig dat verraad pleeg: ”n Nasie kan sy dwase en selfs die ambisieuse oorleef.
Maar dit kan verraad van binne nie oorleef nie. Die beweging van Luthuli en Tambo moet homself reinig van die Judas wat ons volk se totale emansipasie vir silwer verkoop het om dit te oorleef,” het hy getwiet.
Dit is egter onwaarskynlik dat Masina se opinie te veel gewig sal dra. Die burgemeester, wat al verskeie wantrouemosies oorleef en verlede jaar ‘n herrie ontketen het toe hy ‘n oproep gemaak het dat die land “wit kapitaal” in duie moet laat stort, is ‘n uitgesproke kritikus van Ramaphosa.
Met die party se presidentsverkiesing in 2017 het hy Ramaphosa se teenstander, Nkosazana Dlamini-Zuma, gesteun om oudpresident Jacob Zuma op te volg.
Hy het gesê as Ramaphosa wen, sal hy bedank want hy weier om onder hom te dien. Toe Ramaphosa verkies is, was hy egter tjoepstil oor bedanking.
In Junie het Masina ook onthul dat die Oos-Randse metro die tienling wat die land aan die gons gehad het, opgespoor het en dat al tien die babas springlewendig en gesond was.
Natuurlik was daar nooit so ‘n tienling nie.
Intussen beweer die ondersoekende joernalistiekgroep amaBhungane dat Masina betrokke was in ‘n hoëspoed-motorongeluk wat toegesmeer is.
Die bewerings in die groep se verslag sluit in:
Masina het ‘n bloulig VIP-voertuig sonder toestemming bestuur.
Hy het in die aandklokreel-tyd met die motor gery.
Die metropolisie het gesê die bestuurder van die voertuig het soos ‘n dronk mens opgetree.
Masina is van die toneel af gehaas voordat hy sy verklaring kon gee.
Getuies is gewaarsku om nie oor die voorval te praat nie.
Die ongeluk het glo rondom middernag op 20 Augustus verlede jaar plaasgevind. ‘n BMW 540i het ‘n vragmotor op die N12-snelweg van agter getref.
Die vragmotor was onbeskadig, maar die motor het geringe skade opgedoen.
Die vragmotorbestuurder het aan amaBhungane gesê dat die BMW vinnig gery het en voor die botsing oor bane geswaai het. Nadat albei voertuie stilgehou het, het Masina na bewering op die vragmotorbestuurder begin skree.
Mans van twee ander motors het die bestuurder ook aggressief genader.
