Wetgewers in Kalifornië wil dit onwettig maak om ‘n kondoom tydens seks sonder jou seksmaat se medewete te verwyder.
Toe die Yale-regstudent Alexandra Brodsky in 2017 in ‘n referaat geskryf het dat ‘stealthing’ (die subtiele verwydering van ‘n kondoom tydens seks), aan verkragting grens, het sy nie verwag dat dit wetgewing sou word nie.
Wetgewers in Kalifornië het Dinsdag ‘n wetsontwerp goedgekeur wat ‘stealthing’ verbied en slagoffers in staat stel om seksmaats te dagvaar wat kondome verwyder sonder toestemming.
“Ek het die opstel in my derde jaar van my regskursus geskryf en nooit gedroom dat dit die reg op enige manier sou beïnvloed nie,” het Brodsky (31), wat nou ‘n burgerregte-advokaat is, Vrydag gesê.
Goewerneur Gavin Newsom het op 10 Oktober die wetsontwerp onderteken, wat Kalifornië die eerste staat in die land kan maak wat hierdie praktyk onwettig maak.
Brodsky het bevind dat baie van die slagoffers van ‘stealthing’ ongewenste swangerskappe en seksueel oordraagbare infeksies vrees. Hulle beskryf dit vir haar as ‘n “skending van vertroue en ‘n ontkenning van outonomie, en nie anders as verkragting nie,” skryf sy.
Die borg van die wetsontwerp, Cristina Garcia, ‘n lid van die staatsvergadering van Kalifornië, het Newsom aangemoedig om die wetsontwerp te onderteken en “duidelik te maak dat ‘stealthing’ nie net immoreel is nie, maar onwettig”.
