Die vrou van Gary Player, Vivienne Player, is dood nadat sy pankreaskanker opgedoen het.
Vivienne is in Junie verlede jaar met pankreaskanker gediagnoseer en het vordering gemaak met haar herstel.
In Augustus verlede jaar het Player die volgende gesê: “Na ‘n huwelik van 63 jaar het ek en Vivienne alles deurgemaak. Haar kankerdiagnose was skokkend, maar gelukkig was haar behandeling by Issels Medical Center ongelooflik. Haar herstel is nie agter die rug nie, maar sy is goed op pad. Dankie aan almal wat ondersteuning getoon het,” het hy op Twitter geskryf.
Die egpaar is in 1957 getroud en het in Januarie vanjaar hul 64ste huweliksherdenking gevier.
Player het dikwels ‘n groot deel van sy sukses op die baan toegeskryf – hy het 167 toernooie wêreldwyd, waaronder nege hooftoernooie, gewen – aan die ondersteuning wat hy van sy vrou ontvang het.
Saam het die egpaar ses kinders gehad – Jennifer, Marc, Wayne, Michele, Theresa en Amanda. Hulle het 22 kleinkinders en twee agterkleinkinders.
Gedurende die vroeë deel van Player se loopbaan het hy na toernooie gereis saam met Vivienne, hul ses kinders, ‘n oppasser en ‘n tutor.
Player se broer, Ian Player, is dood in 2014. Ian was ‘n Suid-Afrikaanse omgewingsaktivis en natuurbewaarder wat ‘n sleutelrol gespeel het om die witrenoster van uitwissing te red.
Player is Suid-Afrika se suksesvolste sportman ooit en was bekend as ‘n pionier in die oefenroetines vir professionele gholfspelers. Hy staan bekend as Mr Fitness, sowel as die Black Knight. – Foto: SAPEOPLE.COM
