Skip to main content

Die algemene opinie is dat al drie hierdie mense, Bheki Cele, van die polisie, Ayanda Dlodlo, van veiligheid en Nosiviwe Mapisa-Nqakula, van verdediging, hoogs onbevoeg is vir daardie drie belangrike poste.

Wat is hul kwalifikasies?

Mnr. Cele het ‘n onderwysdiploma.

Me Dlodlo het ‘n aantal nagraadse kwalifikasies in bestuursontwikkeling; ondernemingsbestuur- en uitvoerende ontwikkelingsprogramme.

Me Mapisa-Nqakula het ‘n Primêre (laerskool) Onderwysdiploma

Die vraag is nou of julle dink dat die bogenoemde kwalifikasies sal help dat ons en ons land veilig sal wees?

Of is die gesegde ‘’n kryger met ‘n saak is die gevaarlikste soldaat van almal’ in hierdie geval waar?

Hierdie is ‘n uitmuntende voorbeeld van hoe disfunksioneel ons kabinet werklik is. Veral na aanleiding van die afgelope spul dae se gebeure:

Dlodlo vertel aan joernaliste sy het haar geheime agente se intel-lêers aan die polisie deurgegee om die politieke boewery betyds te onderdruk.

Cele ontken ten sterkste dat hy en die polisie enige inligtingsverslae van Ayanda Dlodlo, minister van staatsveiligheid, ontvang het.

Mapisa-Nqakula weerspreek haar baas, Cyril Ramaphosa, in die openbaar.

Ander Bheki Cele flaters

‘n Polisie-huurskandaal kan belastingbetalers meer as R1 miljard kos, soos in 2011 berig in die Sunday Times.

“Nedbank het verlede jaar ingestem om Roux Shabangu R220 miljoen te leen om ‘n gebou te koop, wat hy beplan om aan die polisie te verhuur in ‘n ooreenkoms van R614 miljoen, wat Bheki Cele, nasionale kommissaris van die polisie, gesluit het sonder om die tenderproses te volg.”

Cele was hieroor in die pad gesteek deur Jacob Zuma.

Meer onlangs:

In Februarie het Cele na Nkandla gegaan en ongeveer drie ure saam met Zuma deurgebring nadat hy die bevel van die konstitusionele hof om voor die Zondo-ondersoek te verskyn, betwis het. Sy redes vir die besoek was om sy (Zuma) bekommernisse hieromtrent aan te hoor. Die vraag op almal se lippe was: Wat is so spesiaal aan Zuma, en hoeveel ander aangeklaagdes het Cele al besoek om ‘hul bekommernisse’ aan te hoor?

Cele verdedig daarna die SAPD se duidelike versuim om op te tree nadat Zuma honderde ondersteuners by Nkandla toegespreek het en Covid-regulasies geïgnoreer het. Dit is dieselfde minister wat nie sou huiwer om mense uit hul eie erwe in hegtenis te neem nie. Dieselfde man wat persoonlik mense se alkohol tydens die eerste drankverbod uitgegooi het. Die man wie se polisiemag mense weens simpel redes in hegtenis neem. Dit is hoe hy die regulasies wat die president bepaal, “respekteer”. Maar die Nkandla-saak, wat ‘n duidelike oortreding van die wet was, word nog deur die polisie ondersoek…

Tans word Cele onder die loep geneem nadat hy aan die konstitusionele hof gesê het dat die polisie die arrestasiebevele van Jacob Zuma nie sal nakom nie. Cele en die nasionale polisiekommissaris het tesame ‘n brief aan die Konstitutionele Hof geskryf en verklaar dat hy Zuma nie gaan arresteer nie. Bheki Cele en die nasionale polisiekommissaris, Khehla Sitole, het die opdragte om oudpres. Jacob Zuma in hegtenis te neem blatant geïgnoreer.

Ayanda Dlodlo elders in die kollig:

Dlodlo was die een wat McBride na SSA gebring het en ‘n drie jaar kontrak aangebied het wat in Junie 2023 sou geëindig het.

Die minister van staatsveiligheid, Ayanda Dlodlo, en die minister van waterwese, Lindiwe Sisulu, is albei aangewys as moontlike kandidate om hul werk te verloor volgens ‘n artikel wat deur Mail & Guardian op 11 April 2021 gedruk is.

Ayanda Dlodlo (alias Mable Gqiniya) was reeds in 1982 betrokke by studentepolitiek, in die SRC en SASCO, in Orlando West High. Sy was een van die vroue wat verbete deur die polisie gesoek was omdat sy vermoedelik ‘n opstoker was vir die skoolboikotte in die omgewing.

Ander Nosiviwe Mapisa-Nqakula skandale:

In 2013 was Mapisa-Nqakula ook in die kollig toe sy gevra was waarom 13 van RSA se soldate in ‘n strategies onbenullig land gesterf het. Dit nadat sy nie die regte stappe gevolg het om die redes te verklaar oor hoekom ons soldate na ‘n land gestuur word waar ons nog nie eers op daardie stadium ‘n ambassade gehad het nie. Dit is eers in 2017 geopen.

Op 17 Desember 2020 het The Star ‘n uitgelekte ondersoekverslag aan die Departement van Verdediging onthul wat kommerwekkende bewerings van korrupsie binne die Verdedigingsintelligensie ter waarde van meer as R4 miljard onthul het.

Die ondersoek het ook aan die lig gebring dat verdedigingsintelligensiefondse in 2018 geplunder is, waarin ‘n reeks korrupte aankoop-ooreenkomste uiteengesit is. Daar is bewyse van ‘n verdagte opleidings-tender vir kuberveiligheid wat aan die maatskappy toegeken is met die naam “Saber Technologies”.

Die maatskappy is vooraf R22 588 670 betaal sonder om die behoorlike proses en behoorlike goedkeuring te volg. Daar word geglo dat die hoof van die verdedigingsinligting die tender op 26 Oktober 2018 goedgekeur het, ‘n maand voordat die tender deur die begrotings- en aankopingsprosesse gegaan het.

Minister Mapisa Nqakula moes oor ‘n reeks departementele flaters deur die loop van die jaar antwoorde verskaf. Dit sluit in:

Haar aanvanklike steun aan die bevindinge van die Suid-Afrikaanse Nasionale Weermag oor die dood van Collins Khosa, wat die SANW skynbaar vrygespreek het met ‘n beëdigde verklaring by die hof, net om later te beweer dat sy deur die SANW-leierskap mislei is;

Die volledige verontagsaming van wetgewing en regulasies op 9 September 2020 toe sy en ‘n ANC-afvaardiging met ‘n Falcon-900 Jet na Zimbabwe gereis het;

Die SANW se vermorsing van minstens R215 miljoen op die skynbaar onwettige invoer van ‘n ongeregistreerde Covid-19-behandelingsmiddel bekend as ‘Interferon’ uit Kuba sonder oorlegpleging met die departement van gesondheid en ander staatsdepartemente. Dit het in November 2020 aan die lig gekom.

In totaal kon die R4 miljard wat van die Departement geplunder is, gebruik word vir dringender behoeftes, soos die voorkoming van te veel uitgawes aan werknemers wat bygedra het tot die gekwalifiseerde bevinding van die ouditeur-generaal, die noodsaaklike opgradering in die middeljare van die drie Fregatte tot die waarde van R2,25 miljard, en die noodsaaklike opgradering van die drie ouerige duikbote ter waarde van R1,35 miljard.

Hierdie geld kon ook na Projects Hotel en Biro gegaan het. Die eerste patrollievaartuig aan wal onder Project Biro is amper voltooi met die verwagte afleweringsdatum in die eerste helfte van 2021.

Mapisa-Nqakula het ook na bewering tussen 2017 en 2019 hordes kontant en geskenke van altesaam R5 miljoen van ‘n kontrakteur van die Suid-Afrikaanse Nasionale Weermag (SANW) ontvang.

Die aantygings is vervat in ‘n brief wat leier van die United Democratic Movement (UDM), generaal Bantu Holomisa, verlede week aan die voorsitter van die parlementêre gesamentlike staande komitee oor verdediging gestuur het.

Jan Publiek moet die kabinet geloofwaardig vind. Dit wat uit hul monde kom moet die waarheid wees, veral tydens nasionale krisisse.

Leave a Reply