Skip to main content

Julius Malema, leier van Economic Freedom Fighters (EFF), het die salarisse van twee provinsiale leiers teruggehou omdat hulle nie ‘n maandelikse organisasieverslag gelewer het nie. Dié wat deurgeloop het is die party se Gautengse voorsitter, Itani Mukwevho, en sekretaris, Moshe Koma.
Malema het gewaarsku dat hy dit aan meer lede in die party sal doen, aangesien niemand hom kan vertel hoe hy sy organisasie moet bestuur nie. Volgens ingeligtes was dit Malema se manier om hulle ‘n les te leer nadat hy gewaarsku het dat dit in sy party, anders as die African National Congress (ANC), nie genoeg was om net verskoning te vra nie.
Spanning neem toe binne die party, en dit voor die verkiesende streekvergaderings asook die verkiesing van partyraadslede. Dit moet gebeur voordat die verkiesings van die plaaslike regering plaasvind.
Malema het 11 dae gelede aan joernaliste gesê dat provinsiale leierskapstrukture ontbind sal word as hulle nie seker maak dat 90% van die streke takke begin nie.
“Dit is nie ‘n geheim nie, dis ons party en dit is hoe ons dit bestuur,” het die EFF-leier gesê. “… en as jy nie daarvan hou nie, kan jy eenvoudig die party verlaat.”
Mense in sy binnekring het gesê dat Malema se geharde kommandant-styl dikwels veroorsaak dat al die reëls oorboord gegooi word terwyl hy die orde van die dag dikteer, en sommige het gesê dat die EFF soms soos ‘n spazawinkel gevoel het.
Malema se standpunt word in twee sinne opgesom: “Jy kom en sluit aan by die politiek. Oor ‘n tydperk van minder as sewe jaar verdien jy geld uit die politiek, maar voeg geen waarde by nie,” het Malema gesê.
Sommige van die party staan by Malema en voer aan dat die twee leiers wat hul salarisse kwyt is onbevoeg was en geweet het dat Malema ‘n punt moes bewys. Dit is omdat hy nie kon bekostig om die provinsie te ontbind na Mandisa Mashego se vertrek nie. Hy kon ook nie waag om ‘n swak vertoning by die plaaslike peilings te lewer nie, aangesien koalisies dan ‘n waarskynlike feit sou wees.
Malema het ook gewaarsku dat meer salarisbesnoeiings en skorsings op die spel was, sou leiers nie die party se verwagtinge nakom nie.

Leave a Reply