‘n Reuse metaanwolk is per satelliet opgemerk naby steenkoolmyne. Dit vestig die aandag op ‘n minder bekende omgewingsrisiko wat die gevolg is van die gebruik van vuil fossielbrandstof.
Die kragtige kweekhuisgas metaan vergader ongeveer 84 keer meer hitte as koolstofdioksied gedurende sy eerste twee dekades in die atmosfeer.
Die wolk is volgens Kayrros op 10 Mei met ‘n geskatte tempo van 65 ton per uur vrygestel. Kayrros, ‘n ontledingsmaatskappy in Parys, het die lekkasie raakgesien deur satellietwaarnemings van die Europese Ruimte-agentskap te ontleed. Dit was die ergste wolk van metaan wat Kayrros vanjaar oor Afrika opgespoor het.
Die wolk is ongeveer 125 km oos van Johannesburg in ‘n gebied waar Sasol verskeie steenkoolmyne asook chemiese en brandstofbedrywighede het. Sasol het gesê dat hy daardie dag – 10 Mei – geen verhoogde metaanvlakke aangeteken het nie en dat die gasse van hul mynboubedrywighede ‘sterk verdun is en versprei word oor ‘n wye geografiese gebied’. Anglo American het gesê dat die oopgroef-Isibonelo-myn daar naby ‘hoogs onwaarskynlik hierdie tipe vlakke sal uitstoot’.
